Uztailaren 2an, Arabako Ollavarre-Olabarri udalerriko bizilagunek klima-aldaketaren aurkako borrokan zeregin aktiboa izatea erabaki zuten, eta energia-erkidego bat eratu zuten, energia berriztagarrien erabilera sustatzeari buruzko Europako Zuzentarauak ezartzen dituen ezaugarriei jarraituz eta Nazio Batuen 2030 Agendaren Garapen Iraunkorreko Helburuen (GIH) 7. helburuarekin bat etorriz.
Datozen hilabeteetan martxan egongo den 47 kWp-ko potentzia nominaleko instalazio fotovoltaikoarekin, Olabarriko Tokiko Energia Erkidegoak % 43ko autokontsumoa lortzea aurreikusi du. Potentzia fotovoltaiko horrekin eta bere autokontsumoarekin, urtean 27,4 tona CO2 eta 78,5 mg hondakin erradioaktibo isurtzea saihestuko da. Bestalde, heterokontsumoaren energia-zatia ere % 100 berriztagarria izango da, Red de Comunidades Energéticas S.Coop. bidez.
Gazteluko Energia-Erkidegoari esker urtean isurtzeari utziko zaion 27,4 CO2 tonak 80 urtez 246 pagok hartutako CO2aren baliokidea da. Bestela esanda, urtebete barru, Energi-Erkidegoak baso horrek 80 urtez egingo zukeen lana egiten du.
Energia-erkidego hau martxan jartzea bat dator Arabako Foru Aldundiak bultzatutako KLIMA ARABA 2050 Estrategiarekin. Estrategia horren helburua da energia berriztagarriak sustatzea, CO2 isurketak murriztea, lurraldean energia berriztagarriaren sorrera areagotzea Km0 filosofiarekin eta energia berriztagarriaren autohornikuntza eta autokontsumoa sustatzea.
Gastuak aurrezteko eta planeta zaintzeko garaia da. Pandemiaren ondorioz, ohiturak aldatu behar izan dira, eguneroko beharrak beste modu batera konpondu behar dira, eta klima-aldaketaren bilakaerari erantzun behar zaio, naturaren zaintzan oinarrituta.
Eta hori guztia posible da, Ollavarre-Olabarriko jendeak erakusten duen bezala, tokiko eremuan jardunez, gure ingurune hurbilean, eredu kooperatibo berriak sustatuz energia berriztagarrien kudeaketa eta kontrol komunitarioaren inguruan.